O anuncio das novas confirmacións do festival Revenidas 2026 vén acompañado do cartel desglosado por días e o seu correspondente lote de entradas á venda.
E é que ao resto de nomes anunciados até a data hai que engadir a El Pony Pisador, un quinteto barcelonés que combina folk, cantos de taberna e un gran espírito festivo; La Sra Tomasa, que chegada tamén desde Barcelona cativará o público coa súa aposta pola fusión de ritmos latinos e electrónica; De Vacas, unha proposta con humor e unha marcada personalidade; ou Taqbir, un reivindicativo grupo punk marroquí que aborda cuestións como o patriarcado e a falta de liberdade.
Xunto a eles e facendo un total de dez novos artistas confirmados están:Tapa D'Orella, Lisdexia, Awakate, Maloa Brothers, Yaya Dj e A Duendeneta, que se suman ao cartel dun festival que arrincará o próximo 10 de setembro en Vilaxoán.
Tres destas confirmacións, O Pony Pisador, Yaya Dj e A Duendeneta, estrearanse no primeiro día do festival xunto a Narco, Sara Hebe, De Ninghures, Sons of Aguirre & Scila, Ninguén González e Süne.
A Duendeneta, que este ano celebra a súa décima presenza de forma consecutiva no Revenidas, repetirá o venres xunto a Evaristo, Bob Vylan, Dakidarría, Ilan Amores, A Sra.Tomasa, Matah, Terrae, The Salsa Punk Orkestra e Arrhythmia.
Algúns dos nomes máis esperados nesta edición do festival de Vilaxóan entrarán en acción o sábado 12 de setembro, unha xornada que brindará ao público os concertos de artistas como El Drogas, Fillas De Cassandra, The Rapants ou 9Louro, que presentará o seu novo disco Amorrer.
Xunto a eles actuarán A Gossa Sorda, Taqbir, Rebeliom do Inframundo, Kumbia Queers, Malifeta, Awakate, Maloa Brothers, Queen Rendi, Tapa De Orella e A Duendeneta pechando o festival.
A tradicional sardiñada popular porá o broche final o domingo 13, unha xornada marcada pola Gala de Circo Solidaria e as últimas actuacións da fin de semana da man de Mekanika Rolling Band, As do Xeito, De Vacas e Lisdexia.
As entradas por días xa están dispoñibles en www.revenidas.com con diferentes prezos segundo a xornada do festival en cuestión. A máis económica é a do xoves cun prezo de 28€ seguida do venres, a 35€ e do sábado a 38€, todo iso sumado aos gastos de xestión correspondentes.
Engade Pontevedra Viva como fonte preferida de Google de balde
Mantente informado coas últimas noticias de actualidade.