A película Romería, rodada pola directora Carla Simón en Galicia, será o filme que inaugure a décimo oitava edición do Festival de Cinema de Bueu (FICBueu), que se celebrará entre os días 5 e 20 de setembro.
A proxección desta película será o 5 de setembro, o mesmo día que chegará ás salas de cine de toda España, e contará coa presenza de dúas dos seus protagonistas, os actores Alberto Gracia e Marina Troncoso.
Con Romería, estreada recentemente no Festival de Cannes, Simón continúa explorando ao redor dos vínculos familiares, un dos temas centrais da súa cinematografía.
Nela, Marina (Llúcia Garcia), adoptada desde moi pequena, viaxa a Vigo para atoparse por primeira vez coa familia do seu pai biolóxico, pero a súa chegada trae de volta un pasado que parecía estar xa enterrado.
Guiada polo diario da súa nai e a través dunha conexión especial co seu novo primo, Marina descubrirá as feridas familiares e poderá por fin revivir a memoria fragmentada duns pais dos que apenas ten recordos.
Romería, que se achega á crise da heroína e a sida nos anos oitenta, é a terceira longametraxe da cineasta catalá, tras as aclamadas Estiu 1993 e Alcarràs.
Esta proxección non será a única actividade relacionada con este filme que acolla o FICBueu.
Ana Pffaf e Ernest Pipó, montadora e compositor da música da película, respectivamente, participarán nunhas xornadas cinematográficas ao redor da música e o cine, onde explicarán a súa participación neste novo proxecto de Carla Simón.