Trinta e cinco artistas galegos participan na exposición Rosalía Ilustrada que chega a Pontevedra. Estará no vestíbulo do Pazo Provincial até o próximo 31 de agosto.
Rosalía Ilustrada, un proxecto da Fundación Rosalía de Castro, é unha proposta cultural que ofrece un diálogo entre literatura e arte visual a partir da obra de Rosalía de Castro.
A exposición, de carácter itinerante, será inaugurada este luns 20 de xullo.
Reúne ilustracións orixinais e con técnica manual realizadas por estes artistas, que interpretan textos da autora desde linguaxes plásticas contemporáneas.
A mostra pon de manifesto a vixencia da figura de Rosalía de Castro, cuxa influencia transcendeu a literatura para converterse nun símbolo cultural de Galicia, inspirando tamén disciplinas como a música e as artes visuais.
Miguelanxo Prado, Luís Davila, Xaquín Marín, Bea Lema, Andrea de Toba, Elga Lamas, Carlos Arrojo, Iria Ribadomar, Manel Cráneo, Bea Gregores, Álvaro de la Vega, Leandro Lamas ou Xosé Cobas son algúns dos autores que forman as pezas da exposición.
Tamén participan Fran Jaraba, Nacho Hortas, Suso Cubeiro, María Fe Quesada, Manuel Uhía, Pepe Carreiro, Xan López, Fausto, Norberto Fernández, Fran Bueno, Jacobo Fernández, Andrés Meixide ou Kiko da Silva.
Pablo Otero, Primitivo Marcos, Miguel Robledo, Fernando Iglesias, Federico Fernández Alonso, Óscar Villán, Fino Lorenzo e Raquel González completan a nómina de artistas.
Rosalía Ilustrada, unha vez inaugurada, poderá visitarse no vestíbulo do Pazo Provincial de luns a venres en horario de 9:00 a 20:00 horas.
Engade Pontevedra Viva como fonte preferida de Google de balde
Mantente informado coas últimas noticias de actualidade.