A organización do festival Surfing the Lérez, que volverá converter a Illa das Esculturas de Pontevedra nunha auténtica romaría urbana, segue dando forma ao cartel da súa próxima edición, que se celebrará os días 12 e 13 de xuño.
Tres novos grupos e artistas súmanse a un cartel no que xa figuraban Niños Bravos e a banda francesa Max Foxes.
Sobre o escenario do festival soará o rap do galego 9Louro, o soul e o funk da banda Freedonia ou o punk cómico de Estrogenuinas.
9Louro, o alter ego de Martín Louro, chegará ao Surfing the Lérez co seu segundo disco, Amorrer, editado este mesmo ano e que marca un salto na súa traxectoria artística.
É unha das voces emerxentes máis destacadas da música urbana galega. Aposta por un son que se move entre o trap, a electrónica e as melodías emocionais.
Freedonia, pola súa banda, é unha das bandas de referencia do soul e o funk nacional.
Cunha voz incendiaria e oito músicos cheos de creatividade sobre o escenario, prometer facer gozar ao público cunha sección rítmica moi potente e un directo demoledor.
As últimas desta nova remesa de confirmacións son Estrogenuinas, un grupo eminentemente feminino que apostan polo seu propio xénero, o 'chirll-out', é dicir, tocar "o que lles sae da chirla".
Humor, crítica social e cultura unidos baixo un mesmo artefacto sonoro, reivindicando a comedia como arma de pensamento e cunha posta en escena vándala e eléctrica.
Nas próximas semanas iranse anunciando novas incorporacións ao cartel.
Engade Pontevedra Viva como fonte preferida de Google de balde
Mantente informado coas últimas noticias de actualidade.