O Palacete das Mendoza, sede de Turismo Rías Baixas, acolle a partir deste xoves 19 de xuño a exposición 'O Camiño Portugués, por Pepe Varela', do veterano fotógrafo coruñés Pepe Varela.
A Deputación de Pontevedra inaugura a mostra este xoves ás 19.00 horas e estará dispoñible ata o 9 de xullo na sala de exposicións do Palacete das Mendoza.
Os horarios de visita da mostra serán os seguintes: de luns a venres de 9.00 a 21.00 horas, e os sábados, domingos e festivos de 10.00 a 14.30 e de 16.30 a 20.00 horas.
A mostra inclúe imaxes que van máis alá da paisaxe, retratando a serenidade, a maxia dos detalles e a conexión profunda cos peregrinos.
Cada fotografía é un testemuño da súa habilidade para contar historias sen palabras, transmitindo emocións e vivencias únicas a través dunha viaxe visual que celebra a vida, a arte e o espírito do Camiño.
Deste xeito, a exposición é unha homenaxe á súa mirada, ao seu legado e ao seu amor pola fotografía, que aínda segue vivo despois de tantos anos.
Pepe Varela, de 88 anos e cunha traxectoria marcada pola paixón e o talento, invítanos a descubrir o Camiño Portugués a través dos seus ollos, percorrendo este itinerario desde unha perspectiva íntima e emocional.