Desde o 25 de outubro de 2024, o Museo de Pontevedra acolle a exposición "Vento" do pintor, fotógrafo e viaxeiro contemporáneo Alberto Baraya.
O proxecto forma parte da segunda mostra do ciclo de exposicións "Infiltracións", que cada ano convida a dous artistas a traballar coa colección do museo para crear novas lecturas sobre os seus fondos.
A peza central de "Vento" é unha vela dun bote polbeiro, pintada por Baraya mentres navegaba pola ría de Pontevedra.
A obra está en proceso de ser enviada a Madrid, para poder exhibirse na Feria de Arte Contemporáneo, tamén coñecida como Arco Madrid, do 5 ao 9 de marzo.
Con todo, a exposición, situada na primeira planta do Edificio Castelao, seguirá aberta ata o 2 de marzo cos demais elementos que a conforman.
Entre estes, atópase un vídeo no que se mostra o proceso de creación da vela, xunto con pinturas de paisaxes mariñas, maquetas de embarcacións, cerámicas, planos, instrumentos de navegación e outros elementos relacionados co mar pertencentes ás coleccións do Museo de Pontevedra.
Son, na súa maioría, obras que habitualmente non están expostas, polo que a mostra é unha oportunidade para achegarse a unha parte pouco coñecida da riqueza artística do Museo.
Coa realización da súa obra, Baraya busca poñer en valor os períodos históricos nos que se utilizaron velas de barco como soporte para elaborar pintura colonial en América.
Para realizalo, o artista utilizou a técnica do plenairismo, referida á pintura "au plein air", ou pintura realizada ao aire libre.
Este recurso, cuxa creación é atribuída aos primeiros impresionistas, consiste en utilizar a luz natural para estudar e conseguir determinados efectos na pintura.
Grazas á técnica plenairista, o autor buscaba habitar e capturar a paisaxe mentres transitaba por ela.
A obra foi realizada grazas á colaboración da asociación de amigos das embarcacións tradicionais Os Galos, de Bueu, e da Escola Naval de Marín.
Este ano as artistas seleccionadas para "Infiltracións" son Marta Pazos, cuxa exposición estará aberta ao público na primavera, e Ira Lombardía, que presentará o seu proxecto no outono.