"Se es desas persoas que pasaron por diante infinidade de veces pero descoñece a historia deste destacado monumento, deberías sumarte ás visitas guiadas" ás Ruínas de San Domingos en Pontevedra. É o reclamo que utilizan en redes sociais desde o Museo de Pontevedra para fomentar as visitas a este espazo.
Lembran así aos residentes na cidade e tamén aos visitantes que todos os xoves a partir das 12.00 horas se poden descubrir segredos desta obra arquitectónica unida á historia da cidade. Un templo gótico que comezou a construírse a finais do século XIII, tras a chegada dos dominicos á vila.
Xa no século XVIII tentouse unha reconstrución de estilo neoclásico, que non chegou a terminarse. Actualmente consérvase a cabeceira da igrexa con cinco ábsidas poligonais e un muro lateral cunha pequena portada e o seu rosetón.
As visitas guiadas ás Ruínas son gratuítas, respectando os protocolos de seguridade sanitaria.