Se as previsións meteorolóxicas se cumpren os atletas inscritos para a VII Carreira Pedestre de San Brais desafiarán un ano máis á chuvia na primeira cita do ano dentro do Circuíto de Carreiras Populares de Pontevedra (CCCP).
Farano máis arroupados que nunca, xa que se superou a maior cifra de anotación desta carreira ata a data, con 497 deportistas confirmados para a proba sénior, polos 335 participantes de hai un ano.
Será pois un bo arranque para o CCCP, que queda ademais preto do obxectivo sinalado polo concelleiro de Deportes, Agustín Fernández, de chegar aos 350 anotados na súa terceira edición, posto que xa se inscribiron 339 atletas.
Experimentou ademais un notable incremento o número de equipos participantes, pasando dos 5 do ano 2014 aos 15 confirmados nesta ocasión para o inicio do Circuíto.
O prazo para inscribirse no CCCP manterase aberto ata o mes de xuño, coincidindo coa PonteNoite 5 +5, terceira proba do calendario.
En canto á Carreira de San Bras, disputarase o próximo domingo 1 de febreiro con saída ás 12:30 horas.