"81 motivos máis" para sumarse á familia dunha SD Teucro que exhibe a súa historia na rúa

Un "camiño azul" percorre desde este martes a cidade de Pontevedra. É o itinerario co que a SD Teucro quere compartir con todos os pontevedreses o seu oitenta anos de vida, un percorrido polo que "latexa o corazón teucrista" desde os inicios do club.

Así o sinalaron os responsables da xunta xestora do Teucro durante a inauguración de "80 anos de camiño azul", unha mostra que une os lugares que marcaron a "historia compartida" entre o vicedecano do balonmán nacional e a súa cidade.

Desde as súas orixes en Arcebispo Malvar, xunto á antiga panificadora, a exposición fai un percorrido simbólico por cinco lugares emblemáticos para a familia teucrista.

Así, entre os "faros" que aluman este camiño atópanse lugares que son a "esencia" da cidade como A Ferrería, a Praza da Peregrina ou a Praza do Teucro, o sitio que segundo o club "nos define" e cuxo nome levan con orgullo desde o seu nacemento.

Ademais, o mercado de abastos ou a ponte do Burgo e a súa "casa", o pavillón municipal "onde todo cobra sentido", tamén son paradas obrigadas neste percorrido.

Cada parada conta con contidos accesibles, códigos QR, indicacións en braille e audios que permiten revivir ese oitenta anos de paixón azul.

O Teatro Principal acolle, pola súa banda, a exposición conmemorativa "Emocións do Teucro", unha mostra viva do legado teucrista: camisetas, trofeos, fotografías, documentos e recordos persoais que constrúen unha historia compartida entre o Teucro e Pontevedra.

Ambas as propostas permanecerán abertas até o 14 de agosto, con entrada libre.

CAMPAÑA DE SOCIOS

Aproveitando a inauguración destas exposicións, a SD Teucro presentou a súa nova campaña de socios para a tempada 2025-2026, baixo o tema "81 motivos máis" e que supón unha invitación "a seguir formando parte da historia desta gran familia".

Os prezos para esta tempada son 50 euros para mozos entre 15 e 25 anos, 60 euros para xubilados e 80 euros para o socio sénior.

Haberá ademais opción para retirar un carné familiar por 150 euros ou converterse en socio protector por 250 euros.

Os interesados poderán retirar os seus carnés de socios directamente no Teatro Principal, durante o horario de apertura da exposición.