A Sociedad Deportiva Teucro continua coa configuración do seu plantel de cara á nova tempada en Primeira Nacional.
O vicedecano do balonmán nacional, co seu firme obxectivo de regresar a División de Honra Prata, anunciou a continuidade de dúas pezas fundamentais para o proxecto e unha nova fichaxe.
Desta forma, Andrés Pérez seguirá unha tempada máis, achegando a súa "experiencia e compromiso" e, xunto a el, o xogador formado na base, Sergio Cortizo, cuxa "mocidade, compromiso e proxección serán sendo parte fundamental do noso plantel".
A principal novidade en canto a incorporacións é a fichaxe de Iago Rivas.
O xogador de 19 anos procede do BM Reconquista e únese ás filas do Teucro para reforzar a primeira liña, achegando "versatilidade e frescura" ao xogo do equipo grazas á súa condición de ambidiestro.
Coa chegada de Rivas, o equipo pontevedrés suma a súa terceira fichaxe procedente do club vigués tras as previas incorporacións do pivote Iago Vidal e o gardameta Pablo González.
Con estas últimas incorporacións e renovacións, o vicedecano xa ten dez xogadores confirmados para a próxima campaña.
Aos nomes de Andrés Pérez, Iago Rivas e Sergio Cortizo, súmanse as xa anunciadas renovacións de Gonçalo Areias, Caue Herrera, Miguel Monteagudo, Rhuan Marchette e o gardameta Miguel Jiménez Pello.