Nin os problemas que tiveron este ano os seus deportistas para adestrar polo peche de Rías do Sur frea a ilusión do Club Natación Galaico.
A entidade deportiva pontevedresa volveu a demostrar que a súa canteira está en plena forma, e é que había uns anos que non presentaba un equipo de ata seis nadadores nun campionato nacional por idades.
É o que pasou no recente Campionato de España Infantil de Verán celebrado en Logroño, ao que o club pontevedrés acudiu con Paula Fariña, Gisèle Rocha, Iker Pérez, Nadia de la Fuente, Sofía Barros e Pedro Barros.
Era un equipo moi novo, ao estar todos no seu primeiro ano, pero o balance foi moi positivo ao mellorar todos eles as súas marcas, sendo o mellor posto o sétimo lugar de Sofía Barros nos 400 libre.
Unha actuación que reforza o traballo realizado polo Galaico nos últimos meses e que lle enche de moral para pensar xa na nova tempada.