É a súa décimo novena edición e vai camiño de ser a máis popular de todas elas. A Carreira Popular Santiaguiño do Burgo contará o próximo sábado 25 de xullo, día no que se celebra a festividade do patrón do barrio, coa participación de 668 atletas.
É a cifra de deportistas anotados nas categorías promesa, sénior e veteranos, as que puntúan para o Circuíto de Carreiras Populares de Pontevedra na que é a cuarta cita do calendario.
Pero a esta cifra aínda haberá que sumar todas as categorías inferiores, dende chupete ata xuvenil, que tomarán parte nas carreiras previas á gran proba, e cuxa inscrición se pode formalizar o mesmo día.
Dende as 10:00 horas daranse saída aos máis novos e ás 11:00, dende a ponte do Burgo, partirán os atletas absolutos para completar un percorrido de 6.450 metros que discorrerá principalmente a zona da Xunqueira de Alba.
A proba estará organizada un ano máis pola Asociación Xuvenil Santiago Peregrino do Burgo e o Instituto Municipal de Deportes coa colaboracion da Sociedad Gimnastica.