O Club Baloncesto Arxil xa coñece o calendario de competición da Copa Galicia, torneo que centrará a pretempada do equipo verde con encontros de esixencia que mostrarán o seu nivel.
Esta competición contará cunha primeira fase na que se enfrontarán os catro equipos galegos de Liga Feminina 2, o que supoñerá un bo test para todos de cara aos que se poden encontrar na tempada regular.
Ao igual que en liga, as de Mayte Méndez debutarán ante o Cortegada, o día 12 de setembro pero nesta ocasión en Vilagarcía.
O día 15 de setembro as verdes viaxarán a Vigo para enfrontarse ao Celta e pecharán a fase de grupos o 18 na casa ante o Ensino lugués.
O gañador da primeira fase xogará a final da Copa Galicia ante o único equipo galego da máxima categoría, o Universitario Ferrol, o 20 de setembro.