O Club Baloncesto Estudiantes Pontevedra iniciou a pasada fin de semana a segunda edición do seu torneo Nova Escola, co que pretende iniciar aos máis pequenos no deporte da canastra desde un punto de vista no que se prima a educación.
Na súa primeira xornada, disputada no pavillón do IES Xunqueira I, participaron 66 deportistas en idade prebenxamín, benxamín e alevín dos colexios nos que o Estudiantes Pontevedra oferta a actividade extraescolar de baloncesto: Doroteas, Santo André de Xeve e Riomaior (Vilaboa).
A particularidade do Nova Escola radica en que os premios buscan fomentar "a cooperación, o respecto e o compañeirismo, valores fundamentais que poden ser transmitidos de maneira óptima a través da práctica deportiva".
Desta forma ademais das canastras os equipos gañan pola súa xenerosidade (asistencias, xogo en equipo e xogo limpo) e polo seu espírito (ánimar aos compañeiros).
O II Torneo Nova Escola seguirá celebrándose en diferentes xornadas ao longo do curso escolar.