O Clulb Waterpolo Galaico Pontevedra iniciou con bo pé a súa participación no play-off polo título galego, aínda que o fixo sufrindo máis do esperado na piscina de Santa Isabel de Santiago de Compostela.
O primeiro partido da semifinal, ante o CW Santiago, decidiuse nos penaltis despois de cuarto cuartos de máxima igualdade.
Os de Javi de Sáa comezaron con intensidade, mellorando a faceta ofensiva con respecto aos últimos partidos, pero con lagoas en defensa. Durante o partido as alternativas no marcador foron constantes ata o definitvo 15-15, cun gol de penalti dos santiagueses a falta de 48 segundos.
No desempate os pontevedreses mostráronse máis acertados dando un paso de xigante cara á final. Agora o Galaico contará con dúas opcións na casa para pechar a eliminatoria, a primeira o vindeiro sábado 9 de abril ás 17:00 horas no CGTD.
O máis negativo do encontro foi a lesión de Luís, xogador do Galaico, que se fracturou o nariz tras recibir un golpe co xeonllo dun rival nunha acción moi protestada polos pontevedreses.