Os taekwondistas galegos tiveron unha destacada actuación no campionato de España júnior disputado a pasada fin de semana en Zaragoza no que conseguiron un total de 3 ouros, 5 pratas e 5 bronces.
A incrementar o botín galego contribuíu a taekwondista do Mat's de Marín Silvia Otero. A júnior conseguiu unha medalla de prata na categoría de -46 quilos despois de derrotar á catalá Judith Córdoba en cuartos e á andaluza Irene Rodríguez en semifinais. Na final non puido coa manchega Sofía García.
O medalleiro autonómico complétano Javier Otero, Helena García e Mateo Boudjenane, que se subiron todo o máis alto do podio. As pratas levaron o nome de, ademais de Silvia Otero, de Adrián Davila, Ainhoa Teira, Noa Romero e Carla Sesar. Mentres que o bronce foi para Víctor Videla, Elisa Fernández, Alba Rey, Anxo Vidal e Irene Rodríguez.
Con estes resultados, o combinado galego terminou a súa participación en segunda posición da clasificación xeral. O equipo masculino tamén foi segundo, mentres que o feminino, terceiro.