Gañou quen máis o necesitaba. Un Cisne con ausencias caeu derrotado en Aranda de Duero por un Villa de Aranda que debía vencer urxentemente para escapar dos postos de descenso e conseguiuno nun partido no que os pontevedreses non estiveron ben, sendo superados polo conxunto local, que sen facer un gran partido, chegou con máis "gasolina" aos instantes finais.
O partido tivo pouca calidade. Villa de Aranda levou a iniciativa, aínda que sempre con rendas moi curtas durante a primeira parte, para irse ao descanso co marcador igualado (12-12).
Mellorou lixeiramente o xogo dos de Jabato na segunda metade, o suficiente para facer concibir esperanzas de regresar cun triunfo que garantise a permanencia, pero as forzas só lle deron para chegar ao ecuador do período final con vantaxe (17-19).
Os últimos quince minutos foron un suplicio para un Cisne que encadeou erros, incapaz de atopar a forma de facer dano á defensa local, o que aproveitou Villa de Aranda para volver remontar, pasando por encima dos pontevedreses neses quince minutos finais, cun parcial elocuente de 9-2, que lle deu a vitoria (26-21).
Consulta as estatísticas do partido entre Villa de Aranda e Cisne na web da Real Federación Española de Balonmán.