A conta atrás para a XXXVI San Silvestre de Pontevedra comezou.
A Sociedad Gimnástica abriu este venres as inscricións da popular carreira coa que se despide o ano na cidade.
Na Casa da Luz entregáronse os primeiros dorsais de participantes, como en anteriores ocasións, de maneira gratuíta aínda que solicitando a colaboración cun donativo de 1 euros para sufragar os gastos do evento.
Será posible anotarse en horario de 17:00 a 19:30 durante estes primeiros días, un horario que se ampliará desde o mércores 26 ao venres 28 e o luns 30 (de 10:00 a 13:30 e de 16:30 a 19:30 horas), mentres que o domingo 29 e o martes 31 atenderase só en horario matinal (10:00 a 13:30).
A XXXVI San Silvestre de Pontevedra mantén o seu exitoso formato con saída o próximo día 31 de decembro ás 17:00 horas desde a Avenida Montero Ríos.