Xa está en marcha a venda de entradas para o partido de Copa do Rei que enfrontará á Unión Deportiva Ourense e ao Pontevedra Club de Fútbol o vindeiro mércores 29 de outubro ás 20:30 horas no Estadio do Couto.
O conxunto ourensán habilitou a compra online na súa páxina web oficial, facilitando o acceso ás localidades para o público xeral.
As entradas en Tribuna teñen un prezo de 25 euros, cunha cota limitada a 50 unidades, mentres que en Preferencia custan 20 euros para adultos e 5 euros para menores.
Os abonados da UD Ourense poderán retirar a súa entrada física nas oficinas do club e adquirila por 10 euros en calquera das dúas zonas. Ademais, os titulares dos carnés Sentemento e Dragonciño terán acceso gratuíto.
Doutra banda, o Pontevedra Club de Fútbol anima á súa afección a sumarse á 'Marea Granate' para o partido de liga contra o CD Arenteiro, que se disputará no Espiñedo o domingo 26 de outubro.
O club ofrece un paquete que inclúe a viaxe en autobús desde o Pavillón Municipal, con saída ás 9:30 horas, e a entrada para o encontro, que comezará ás 12:00 horas.
O prezo da viaxe máis a entrada é de 30 euros para adultos e 20 euros para menores de 15 anos.
As reservas e o pago en efectivo poden realizarse até o xoves 23 de outubro ás 19:00 horas nas oficinas de Pasarón.