"Estamos moi contentos", asegurou o adestrador do Pontevedra Club de Fútbol, Rubén Domínguez, tras coñecer o resultado do sorteo da primeira eliminatoria da Copa do Rei.
Os granates mediranse á UD Ourense no Couto, equipo da Segunda RFEF.
Un emparellamento que caeu con bo pé no club da Boa Vila tendo en conta cales eran as outras posibilidades que deparaba un sorteo condicionado polo compoñente de proximidade xeográfica.
Numancia, Real Ávila, UP Langreo, SD Logroñés, UD Logroñés, UD Sámano, Atlético Astorga e Náxara eran as outras posibilidades.
Por iso fronte ao Ourense o plantel do Pontevedra aforrara un longo desprazamento entre semana, podendo ir e volver á Cidade das Burgas na mesma xornada e sen apenas desgaste neste sentido.
Ademais "seguro que é un desprazamento que os nosos afeccionados poden facer e non nos sentiremos sós", afirma Domínguez.
"Espero que sexa un gran ambiente, un derbi e un bo ambiente de fútbol para poder gozar toda a xente", completa o técnico.
Iso si, Rubén avisa dos perigos da UD Ourense, un "bo rival que acaba de ascender e ten esas boas sensacións tras o ascenso".