O vindeiro luns 6 de outubro o Pontevedra Club de Fútbol coñecerá o seu rival na primeira rolda da Copa do Rei.
Tras ser a sensación da pasada edición, eliminando a equipos como Levante, Villarreal e Mallorca, os granates coñecerán a partir das 13.00 horas (hora na que se fixou o sorteo) cal será o seu primeiro enfrontamento copeiro esta tempada.
Con todo non existe a posibilidade de xogar fronte a un rival de superior categoría, e mesmo os posibles opoñentes veranse reducidos ao establecer a Real Federación Española de Fútbol por primeira vez un criterio de proximidade xeográfica para dilucidar os emparellamentos.
No caso dos granates, quedaron encadrados no primeiro do catro grupos que completarán o sorteo.
Nese grupo aparecen equipos de Primeira División (RC Celta, Real Sociedad, Deportivo Alavés e Real Oviedo), Segunda División (Real Valladolid, Mirandés, Real Racing Club de Santander, SD Eibar, Real Sporting de Xixón, Burgos CF, RC Deportivo e Cultural Leonesa), Primeira RFEF (Pontevedra, Racing de Ferrol, SD Ponferradina, Real Avilés e Arenas de Getxo), Segunda RFEF (Numancia, Real Ávila, UP Langreo, SD Logroñés, UD Logroñés, UD Ourense, UD Sámano, Atlético Astorga e Náxara) e Terceira RFEF (Caudal, CD Tropezón, Portugalete e Atlético Tordesillas).
Ademais nos próximos días coñecerase o gañador do partido de Copa RFEF entre Bergantiños e Ourense CF e os vencedores das eliminatorias previas (Getxo CD-Betis CF Valladolid, Puerto de Vega-Alberite e SD Textil Escudo-SD Negreira).
Segundo as bases de competición o tres equipos procedentes da previa de categoría autonómica teñen garantido medirse a un Primeira División, xa que se cruzarán "até onde sexa posible, os clubs de inferior categoría contra os de maior categoría", sinala a normativa.
Ademais o seguinte bombo con prioridade será o correspondente ao equipo clasificado vía Copa RFEF.
Tendo en conta isto o Pontevedra non poderá aínda cruzarse con equipos que militan na Liga de Fútbol Profesional (Primeira e Segunda División), e o seu rival sairá do bombo dos equipos de Segunda RFEF, é dicir, da terna que compoñen Numancia, Real Ávila, UP Langreo, SD Logroñés, UD Logroñés, UD Ourense, UD Sámano, Atlético Astorga e Náxara.
Esta primeira eliminatoria será a domicilio para os granates e a partido único, como afai nas súas últimas edicións a Copa do Rei.
Os partidos disputaranse o martes 28, mércores 29 e xoves 30 de outubro.