Apenas dúas semanas estivo soamente Javier Fernández 'Jabato' afastado do Club Cisne Balonmán.
O ata hai pouco adestrador do primeiro equipo cisneísta, co que celebrou dous ascensos á Liga Asobal, seguirá ligado á entidade con novas ocupacións. En concreto será o novo responsable da xestión das categorías base, coordinador dos técnicos do club e director do proxecto no Colegio Los Sauces.
"Desengancharse dun proxecto tan bonito non era sinxelo", sinalou este luns en rolda de prensa o propio Jabato asegurando que "sempre me considerei un adestrador moi de base".
Trátase doutra maneira de seguir achegando a un proxecto que supón "estar seguramente nunha das mellores canteiras a día de hoxe no balonmán nacional".
"Estamos a consolidar de maneira importante o proxecto das nosas categorías base, que é a nosa razón de ser", explicou pola súa banda o presidente do Cisne, Santiago Picallo.
A intención será ademais "dar continuidade" a un traballo iniciado en 2008 por Pablo Domínguez, ao que ambos os dous agradeceron o seu labor.
ABIÁN RODRÍGUEZ E CARLOS OCAÑA, AO PRIMEIRO EQUIPO
A rolda de prensa contou tamén coa presenza de Abián Rodríguez. O porteiro canario, aínda que contará con ficha do filial, pasará a estar en dinámica do equipo de Asobal. En situación similar estará tamén Carlos Ocaña, que se espera aumente a súa presenza no primeiro equipo.