O boxeo nacional volve a escena neste 2026 e o Team Thunder ten unha cita este fin de semana. A escuadra marinense desprázase ata o País Vasco para participar na velada organizada polo club MT Boxing en Sestao (Bilbao).
O escenario elixido, o histórico Pavillón da Benedicta, será un bo termómetro para medir o estado de forma de dúas dos activos máis valiosos do club neste inicio de 2026.
O mozo Miguel Marciel Pacheco non terá un debut cómodo, pero si de gran prestixio. Verase as caras con Kimetz Martín, actual campión de España cadete.
Este enfrontamento perfílase como un dos pratos fortes da noite amateur, ofrecendo a Marciel a posibilidade de reivindicarse ante un dos referentes nacionais da súa categoría.
Para o púxil do Thunder, é a oportunidade de ouro para validar o duro traballo físico realizado durante os meses de pretemporada.
Doutra banda, a experiencia correrá a cargo de Aarón González. O capitán do equipo e peza angular do proxecto marinense medirase ao boxeador local Sendoa Careaga.
Espérase un duelo de alta intensidade onde González, ademais de buscar a vitoria, asume a responsabilidade de establecer o ritmo competitivo que definirá ao club durante o resto do curso.
Desde a dirección do Team Thunder subliñaron que a elección deste evento non é casual. Participar nunha velada deste calibre e fronte a rivais de entidade é unha declaración de intencións:
"Comezar o ano nun ambiente tan exixente e con rivais desta calidade é clave para o crecemento deportivo dos nosos boxeadores", sinalan desde o club.