O Torneo Internacional Boxam de boxeo olímpico celebrado en Murcia supuxo o debut internacional de Aarón González coa Selección Española.
O púxil marinense deu un paso máis na súa carreira como representante nacional no peso welter, no que é o actual campión de España.
Non foi con todo o debut soñado por Aarón, que pagou a súa inexperiencia e cedeu en cuartos de final ante o representante húngaro, András Vadász, máis rodado en competicións de nivel internacional e que conta no seu haber cun bronce europeo.
Foi un combate de menos a máis para o boxeador do Team Thunder, dominado polo seu rival húngaro ata o terceiro asalto, no que o levou ás cordas en varias ocasións, conectando varias mans claras e deixando boas sensacións a pesar de que os xuíces desen o triunfo aos puntos a András Vadász.
Tras este debut, Aarón permanecerá toda a semana concentrado en Murcia co equipo nacional para preparar os seus próximos compromisos.