O Concello de Poio abriu a convocatoria dos Premios ao Deporte San Xoán-Pepe Otero, cos que se busca recoñecer os logros e a traxectoria de deportistas e clubs do municipio durante esta tempada.
Esta iniciativa tamén pretende pór en valor o traballo realizado por asociacións e entidades que promoven a actividade física no municipio.
O Consello Municipal de Deportes reuniuse esta semana para aprobar as bases que rexerán os premios, que se entregarán o luns 22 de xuño, coincidindo co inicio das festas de San Xoán.
O prazo para presentar as propostas xa está aberto e continuará até este domingo, 7 de xuño, a través da sede electrónica do Concello.
As candidaturas deberán incluír o nome das persoas ou entidades propostas, así como unha xustificación da elección.
A selección dos premiados realizarase nunha nova sesión do Consello Municipal de Deportes convocada para o mércores 10 de xuño, na que se analizarán todas as propostas recibidas.
Para a elección terán en conta a situación de cada modalidade deportiva; a mellora de resultados respecto a anos anteriores; os éxitos individuais e colectivos; os logros obtidos a nivel provincial, autonómico, estatal ou internacional; a consecución de fitos non alcanzados previamente; os ascensos de categoría e a presenza de deportistas locais en clubs de primeiro nivel.
O xurado valorará tamén o traballo voluntario, a promoción do deporte, a implicación na vida deportiva do municipio e o número de licenzas vinculadas a cada modalidade.