Co obxectivo de superar os 405 participantes do pasado ano, o cuarto Circuíto de Carreiras Populares (CCCP) abriu o seu prazo de inscrición a poucos días da súa primeira proba.
Os interesados en participar poden anotarse xa a través da web www.championchipnorte.com, abonando unha cota de 30 euros se se conta co chip de cronometraxe e de 45 euros se é necesario adquirilo.
Seis carreira compoñen o calendario, sendo a primeira delas a VIII Carreira Pedestre de San Brais o vindeiro domingo 31 de xaneiro desde as 11:30 horas, momento no que sairán as categorías inferiores, e as 12:30, hora da proba senior.
A saída situarase na contorna do centro comercial de Carrefour cun percorrido de 6.500 metros. O custo de inscrición para esta carreira, fóra do CCCP, é de 5 euros.
Tras San Brais, as seguintes probas do circuíto serán Monte Porreiro (10 de abril), Campañó (28 de maio), PonteNoite 5+5 (18 de xuño), Santiaguiño do Burgo (25 de xullo) e o Medio Maratón (16 de outubro).