O Peixegalego retomou no País Vasco a senda do triunfo ao impoñerse nun agónico final ao Araberri na súa cancha (80-82).
O cadro marinense consolídase na segunda praza da liga LEB Prata e faino con moito esforzo tras un partido no que tivo que remontar nos minutos finais.
Comezou igualado o choque no primeiro cuarto (20-20), pero no segundo o Araberri abriu oco no marcador apoiado na efectividade ofensiva de Tyron (30 puntos, 10 rebotes e 44 de valoración ao final do choque), ao que non conseguían defender con acerto.
Ao descanso chegouse cunha renda local de dez puntos (50-40), pero os de Javi Llorente repuxéronse no terceiro parcial e empezaron a reducir a distancia.
O Peixe arrincou o cuarto definitivo cinco puntos por baixo (67-62), e continuou a súa progresión para, cun maior acerto nos momentos decisivos, completar a remontada.
Rogers, con 26 puntos, foi o xogador máis destacado no cadro marinense, no que outros catro xogadores chegaron a dobres díxitos.
Consulta aquí as estatísticas do partido.