Marín vive con grande expectación as horas previas á final da Copa LEB Prata, que xogará por primeira vez na súa historia o Peixe Galego na busca de estrear o seu palmarés nacional de títulos.
O cadro marinense non estará só en Ávila, onde o sábado (19:00 horas) enfrontarase a El Bulevar, e é que o club organizou unha viaxe para os seus afeccionados, que se completará coa instalación dunha pantalla xigante, na Alameda ou Multiusos en función da climatoloxía, para seguir o encontro a través da retransmisión da Federación Española (www.feb.es).
Para o Peixe o partido será "unha auténtica festa", recoñeceu o seu técnico Javi Llorente á FEB, de "dous equipos modestos coa permanencia como obxectivo prioritario e que imos atopar nesta final un recoñecemento ao gran traballo da primeira volta".
O entrandor marinense é optimista co rendemento dos seus, pero renega do precedente da pasada fin de semana, cando gañaron precisamente ao cadro abulense na Raña en partido de liga: "Na súa pista vai custar moito máis o poder impoñer o noso estilo de xogo".
"Se queremos gañar as nosas opcións pasan por estar moi ben a nivel defensivo nun partido que será moi duro", asegura, nunha cancha na que lembra ninguén conseguiu gañar aínda esta tempada.