Sen apenas descanso tras as súas últimas competicións, Águeda Cons e Paula Goyanes afrontan desde este mércores 17 de agosto unha concentración co equipo nacional de augas abertas.
As dúas nadadoras do Galaico adestrarán ata o día 31 no Centro de Alto Rendemento de San Cugat (Barcelona), onde prepararán a súa participación no próximo Campionato de Europa Junior e Infantil desta modalidade.
No Europeo, que se celebrará na localidade italiana de Piombino do 9 ao 11 de setembro, Águeda nadará a proba dos 7,5 quilómetros e Paula os 10 quilómetros.
Na concentración de San Cugat participan 15 deportistas de toda a xeografía nacional. Ademais tamén está presente Luisa Domínguez, adestradora do Centro Galego de Tecnificación Deportiva de Pontevedra.