O Club Baloncesto Arxil de Pontevedra pechou a incorporación de María González Albaladejo como nova base do equipo para a próxima tempada 25/26.
A xogadora albaceteña, de 26 anos, asumirá a dirección de xogo en substitución de Marta Fernández, quen decidiu continuar a súa carreira en Liga Challenge.
González únese así á tradición de destacadas bases nacionais que dirixiron o xogo do conxunto verde, seguindo os pasos de xogadoras como Carla Fernández, Sandra Entenza ou Marta Taboada, que durante décadas foron o enlace da adestradora sobre a pista.
A nova xogadora do Arxil conta cunha ampla experiencia no baloncesto nacional. Formada nas categorías base do Picken Claret alacantino, debutou en Liga Feminina 2 durante a tempada 16/17 e colgou a medalla de bronce co seu equipo junior no Campionato de España por clubs.
O seu palmarés inclúe tamén participacións coas seleccións da Comunidade Valenciana e en programas da Selección Nacional. Destacou especialmente a súa participación no Europeo U18 disputado en Hungría en 2016, onde conseguiu a medalla de prata.
Tras unha experiencia internacional na WBBL (primeira división británica) coas Durham Palatinates, González regresou a España para continuar a súa carreira deportiva.
Acumulou experiencia en diferentes clubs de Liga Feminina 2 e a pasada tempada competiu en Liga Challenge co Barakaldo, sumando un total de 179 partidos en ligas FEB.
A xogadora chega a Pontevedra nun gran momento de xogo e madurez deportiva. Mestra en Educación Infantil con máster en Educación e Comunicación, compaxinará a súa carreira deportiva coa preparación das oposicións a Educación, do mesmo xeito que outras compañeiras do equipo.