O Club Baloncesto Arxil anunciou a súa primeira fichaxe para a próxima tempada en Liga Feminina 2: Ana Carlota Faussurier Zafrilla.
A xogadora barcelonesa, nacida en 1994, ficha polo equipo pontevedrés para achegar centímetros (189 cm.) e experiencia no interior da zona, nun movemento que marca a planificación do club para a tempada 2025/26.
Faussurier, quen comezou a xogar baloncesto aos 9 anos no CB Yecla, destacou en categorías base formando parte das seleccións nacionais e debutando en Liga Feminina 2 con tan só 16 anos. A súa traxectoria inclúe unha etapa universitaria en Arkansas (EE.UU.), onde compaxinou o baloncesto cos seus estudos de psicoloxía, e un regreso ao baloncesto español onde militou en Liga Endesa, Challenge e Liga Feminina 2.
A nova xogadora do Arxil conta cun notable palmarés en seleccións de formación, incluíndo un Ouro Europeo U20 en 2013 e participacións en Mundiais e Europeos U19 e U18.
Ademais da súa faceta como xogadora, Faussurier segue vinculada á Federación Española de Baloncesto, formando parte do staff técnico como Delegada dalgunhas das seleccións de formación.
O seu último logro foi coa Selección U18, que se proclamou campioa de Europa o pasado 13 de xullo en Palma de Mallorca. Con título de grao 2 de Baloncesto, compaxina a súa paixón na pista coa de adestradora das categorías máis pequenas, o que abre a posibilidade de que se incorpore á canteira do club pontevedrés.
INICIO DA TEMPADA
O Club Baloncesto Arxil, que afronta a súa 41ª tempada, programou un inicio graduado dos adestramentos. As xogadoras dos equipos senior e junior serán as primeiras en regresar ás canchas este luns 1 de setembro, cunha sesión conxunta e outra por equipos.
O xoves 4 comezarán as xogadoras cadete, e a partir do luns 8 de setembro o resto de categorías. Durante todo o mes, o club traballará na preparación de cara ao comezo das competicións oficiais.