O play-off de ascenso para o Pontevedra Club de Fútbol pasa polo Estadio Municipal de Pasarón.
É o sentir do primeiro plantel granate e así o recoñeceu este mércores en rolda de prensa Alberto Gil, a cinco xornadas para o final da competición e con tres dese cinco encontros na casa, empezando pola visita este mesmo sábado 25 de abril (16.15 horas) do Celta Fortuna.
"Temos tres partidos en Pasarón, que sentimos fortes, ademais a afección sempre está a animar ao equipo 90 minutos, sentímolo nos dous últimos partidos. Se conseguimos facer bos números pois teremos moitas posibilidades de entrar", sinala o extremo.
Gil defende ademais que o equipo está "nunha situación privilexiada a falta de cinco xornadas soñando por un playoff que hai dez anos non se consegue".
Por ese motivo invoca os afeccionados pontevedreses e pídelles o máximo apoio posible desexando que "oxalá Pasarón estea cheo o sábado porque é un partido importante".
Nin a dificultade do rival, un Celta Fortuna que marcha segundo na táboa, diminución a confianza do futbolista do Pontevedra, e é que aínda que "veña un equipo de xogadores que de aquí a un pouco estarán a xogar en Primeira División, estamos en Pasarón, estamos na casa, nós xogámonos moitísimo e queremos gañar", afirmou.
Na súa comparencia Alberto Gil destacou ademais o bo ambiente que reina no vestiario granate.
Esa sensación non cambia a pesar da gran competencia actual na súa demarcación de extremo porque "nos levamos todo súper ben. Agora Diego e eu estamos a xogar un pouquiño máis, pero nos alegramos igual ou máis cando marcan Joao ou Luisao".
"Ao final somos un equipo. Aquí o obxectivo está claro, que o Pontevedra gañe, dá igual quen meta os goles ou dea a asistencia", finalizou.
Engade Pontevedra Viva como fonte preferida de Google de balde
Mantente informado coas últimas noticias de actualidade.