Sobresaliente fin de semana de competición para a Sociedad Gimnástica. Se o sábado tres atletas conseguiron subir ao podio nos campionatos de España das súas respectivas categorías, o domingo o club pontevedrés completou a faena cun metal máis.
Conseguiuno Alberto Guerrero no Campionato de España de categoría Promesa celebrado en Toledo.
O atleta da Gimnástica foi segundo nos 800 metros cun tempo de 1:51.83, sendo só superado por Saúl Ordóñez (1:51.69). Ademais na mesma categoría, Sergio Paredes foi sexto no lanzamento de martelo.
Pola súa banda no Nacional Xuvenil disputado en Mataró Lucía Ferrer, cun tempo de 15.27, non logrou entrar na final dos 100 metros valos, mentres Emma Lorenzo acabou duodécima no salto con pértega.