Alejandra Parada: "A Copa do Mundo marcará un antes e un despois para a natación artística en Pontevedra"

Pontevedra acollerá entre o 29 e o 31 de maio, por primeira vez, unha proba da Copa do Mundo de Natación Artística no Complexo Deportivo Rías do Sur, un evento que reunirá á elite internacional e que servirá ademais como escaparate para o crecemento deste deporte en Galicia.

Para o CNA Galaico Pontevedra, a cita "é algo co que non podiamos nin imaxinar", sinala a presidenta do club, Alejandra Parada, quen lembra que a orixe deste proxecto remóntase a hai aproximadamente dous anos, cando a directora técnica do equipo español de natación artística, Ana Montero, visitou as instalacións pontevedresas. "Comentouno dunha forma moi distendida, pero a partir de aí empezouse a traballar até facelo realidade", explica.

Parada cre que será un evento que "marcará un antes e un despois, sobre todo para a natación artística" e insiste en que o impacto xa se está deixando notar incluso antes do inicio da competición.

"A resposta está a ser incrible", apunta, sinalando que se reflectiu na venda de entradas, que "en apenas 10 minutos estaban practicamente esgotadas". A iso súmase a gran cantidade de solicitudes recibidas e a presenza de deportistas do propio club e do Centro Galego de Tecnificación Deportiva, o que levou a unha ocupación total das bancadas. "Deunos pena non poder dar o 'ok' a toda a xente que quedou fóra, pero non hai cabida para máis", admite.

A presidenta enmarca este logro na evolución do propio club nos últimos anos, especialmente coa proxección que está a ter a pontevedresa Daniela Suárez. Desde a actual directiva admite que se apostou por dar un salto na organización de eventos, pasando do ámbito autonómico a campionatos de España. "O primeiro que fixemos saíu fantástico, cunha acollida espectacular, e iso fixo que a federación se fixase en nós", explica. A partir de aí, o Galaico decidiu "ser máis ambicioso, soñar ao grande e lanzarse" a por unha cita de carácter internacional. "Temos unha directiva, un equipo técnico e unha rede de voluntarios impresionante e estamos altamente capacitados para poder organizar este tipo de eventos", asegura.

No plano deportivo, a competición contará coa selección española absoluta, que aproveitará a cita para presentar unha espectacular e sorprendente coreografía ao ritmo de Berghain, un dos temas máis aclamados do último disco de Rosalía e na que leva meses traballando co obxectivo de aspirar ao máximo nos Xogos Olímpicos de Los Ángeles.

O equipo estará formado por Naia Álvarez, Cristina Arámbula, Rocío Calle, Txell Ferré, Mariña G. Polo, Jordi Cáceres, Dennis González ou Eneko Sánchez, aos que se sumarán Mireia Hernández Luna, Aurora Lázaro, Lilou Lluis, Carla Lorenzo, Paula Marcípar, Alisa Ozhogina, Paula Ramírez, Sara Saldaña, a pontevedresa Daniela Suárez e a gran referencia da disciplina en España, Iris Tió.

Precisamente, Parada destaca o papel de Suárez como unha figura clave para o club. "É o noso estandarte de cara ao exterior, unha deportista de dez tanto a nivel deportivo como persoal", afirma, subliñando que a súa proxección contribuíu a abrir portas ao Galaico "en cada sitio ao que vai".

Máis aló da elite, a presidenta pon o foco no impacto que terá a cita na base. "Para as nosas deportistas é un soño ver competir aquí ás mellores do mundo", sinala, destacando a ilusión xerada entre as mozas nadadoras. Ademais, durante a xornada do venres, varios centros escolares de Pontevedra asistirán á competición, co obxectivo de que os máis pequenos coñezan a natación artística.

En canto á situación da disciplina en Galicia, Parada apunta que "estamos xa preto das 700 deportistas e os resultados empezan a acompañar", lembrando a recente participación da selección galega no Campionato de España por federacións autonómicas, con presenza destacada de nadadoras do Galaico. Aínda así, recoñece que comunidades como Cataluña seguen marcando o ritmo e que un dos principais retos pasa por incrementar o apoio institucional e privado. "É o que máis necesitamos os clubs", subliña.

Con todo, Parada insiste en que o obxectivo vai máis aló. "Queremos que este deporte sexa máis visible, máis próximo, sobre todo para os máis pequenos, e seguir crecendo desde a base", conclúe, convencida de que a Copa do Mundo suporá un punto de inflexión para o futuro da natación artística en Pontevedra e en Galicia.

A proba de Pontevedra forma parte dun circuíto internacional que fixo escala en Medellín, París e Xi'an, e que culminará coa Superfinal en Toronto.