O Estadio Municipal de Pasarón acollerá este mércores 23 de xullo a súa primeira actividade da tempada, e non será estritamente deportiva.
Antes de ser escenario do Trofeo Luís Otero fronte á Cultural Leonesa, o Pontevedra Club de Fútbol ten unha importante cita coa Xunta Xeral Ordinaria de Accionistas que foi aprazada o pasado mes de decembro.
Por primeira vez esta convocatoria cos accionistas celebrarase no propio estadio, xa que nos últimos anos as reunións tiveran como escenario lugares como o Teatro Principal, o Pazo da Cultura ou o edificio administrativo da Xunta de Galicia en Benito Corbal.
Os accionistas granates están citados en primeira convocatoria ás 17.45 horas do mércores, e no caso de non existir quorum un día despois á mesma hora, con acceso ao estadio a través da porta de Presidencia, na bancada de Tribuna.
Sobre a mesa haberá sete puntoas na orde do día, sendo o asunto principal o estado das contas a exercicio pechado o 30 de xuño de 2024.
Este é a orde do día da Xunta Xeral Ordinaria do Pontevedra Club de Fútbol segundo a convocatoria publicada no Boletín Oficial do Rexistro Mercantil:
Primeiro.- Informe da Presidenta sobre a tempada pecha a 30 de xuño de 2024.
Segundo.- Exame e aprobación, se procede, das contas do exercicio económico pecho a 30 de xuño de 2024, relativo á tempada 2023/2024 (balance de situación, conta de perdas e ganancias e memoria), do informe de xestión da Sociedade e da xestión do seu órgano de administración, correspondentes ao exercicio social pechado a 30 de xuño de 2024.
Terceiro.- Aplicación do resultado do exercicio social pechado a 30 de xuño de 2024.
Cuarto.- Exposición e aprobación do orzamento do club 2024/2025.
Quinto.- Proposición de renovación de auditor de contas da sociedade para o exercicio 2024/2025.
Sexto.- Delegación das facultades que sexan oportunas na Presidenta para a plena execución e formalización dos anteriores acordos da Xunta.
Sétimo.- Rogos e preguntas.