Se a tempada que asinara Javi Gómez Noya xa era excepcional ata agora, o triatleta galego púxolle un auténtico broche de ouro. Levou a vitoria na primeira edición do Island House Invitational Triathlon, unha exclusiva competición organizada nas illas Bahamas polo multimillonario Mark Holoweskoy e na que participaron, previa rigorosa invitación, tan só dez deportistas de todo o mundo.
Gómez Noya completou as tres xornadas de competición, que se disputaron desde o pasado venres en terras caribeñas, cun tempo total de 3 horas, 8 minutos e 21 segundos. Superou en case un minuto e medio ao surafricano Richard Murray, que acabou a proba en 3 horas, 9 minutos e 42 segundos. Terceiro foi o británico Tim Don cun tempo de 3 horas, 11 minutos e 13 segundos.
O triatleta afincado en Pontevedra chegara xa ao último día como gran favorito ao triunfo final. Vencera con autoridade nas dúas primeiras xornadas: unha proba de 500 metros de natación, oito quilómetros de ciclismo e dous quilómetros de carreira a pé -o venres-; e un Olympic Enduro cun circuíto de 500 metros de natación, 13 quilómetros de ciclismo e 3,3 quilómetros que tiveron que completar tres veces -o sábado-.
Así, Javi Gómez Noya logrou acumular unha notable vantaxe sobre Murray. Como o tempo íase acumulando día tras día, no tríatlon sprint que se disputaba este domingo -750 metros a nado, 20 quilómetros en bicicleta e 5 quilómetros a pé 34 segundos- saíu 34 segundos antes que o seu principal rival. Este formato persecución, no que a vitoria era para o primeiro en chegar a meta, obrigou aos participantes para dar o máximo de si mesmo de principio a fin.
Gómez Noya logrou controlar a carreira desde o primeiro momento. Foi o deportista que máis rápido completou o segmento de natación e a súa vantaxe foi insalvable para os seus rivais. Aínda que esta terceira e última etapa gañouna o estadounidense Cam Dye, que completou a carreira en menos tempo, o primeiro en cruzar a liña de meta foi o ferrolán que deixou ao surafricano a Murray en 1:21.
Ao termo da proba, o triatleta galego expresaba a súa satisfacción na súa conta persoal de Twitter.
Contentísimo por acabar la temporada de esta forma.Victoria en el @IslandHouseTri Una carrera impresionante y única! pic.twitter.com/7Zvta2xF8P
— Javi Gomez Noya (@Jgomeznoya) noviembre 8, 2015
En total, neste Island House Invitational Triathlon repartíanse un total de 550.000 dólares en premios, unha das maiores recompensas económicas que existen neste deporte.