A participación dos deportistas pontevedreses no Open de Portugal 2026 deixa moi bo sabor de boca, especialmente polos dous ouros conquistados na categoría sénior por parte de Roi Fraga e Sergio Troitiño.
No caso de Roi, o taekwondista de club caldense Número Phi logrou a fazaña de alzarse co primeiro posto no seu debut internacional sénior na categoría de -74 kg. Todo iso a pesar de que, por idade, aínda pertence á categoría júnior.
O seu camiño até o máis alto do podio pasou por derrotar a deportistas do máis alto nivel como o estadounidense David Cabrera, o turco Mehmet Polat, o francés Aliou Mane, o polaco Lukasz Cudnoch e o marroquí Abdelhamid Abdouni.
Tamén fixo o seu debut en categoría sénior -67 kg a súa compañeira de club Katy, que caeu en primeira rolda ante a representante norueguesa.
Doutra banda está Sergio Troitiño, que logrou o ouro na categoría de pesos pesados (+87kg) nunha nova demostración do seu gran poderío a nivel internacional. Logralo non foi nin moito menos sinxelo, pois tivo que derrotar a todo un campión mundial e olímpico como Caden Cunningham.
O seu metal non foi o único dos representantes do Club Mat's, pois os taekwondistas marinenses asinaron un espectacular campionato.
E é que tamén en categoría sénior destaca o bronce de Arlet Ortiz (-57kg), que caeu en semifinais ante a italiana Anna Frasica quedándose así a un paso de loitar por subir todo o máis alto do podio.
Outras das grandes noticias para o Mat's chegaron da man de Daniel Agra e Ángela Balado. Daniel fíxose co primeiro posto na categoría júnior -55kg tras vencer ao español Mario Faro na final mentres que Ángela fixo o propio en +68kg despois de imporse a outra española, Jessica Aidee.
Noa Garrido, tamén do Mat's, completou o medalleiro marinense cunha prata en -44kg tras caer na final coa estadounidense Jessica Mayo.
Pechando a representación lerezana está Nicolás Casas, do Mace Sport, que conquistou un meritorio terceiro posto en júnior -55 kg ao caer derrotado en semifinais precisamente ante o deportista do Mat's de Marín Daniel Agra.
Estes resultados deixan un espectacular cómputo global de sete metais no medalleiro lerezano tras un Open Internacional de Portugal para o recordo.
Engade Pontevedra Viva como fonte preferida de Google de balde
Mantente informado coas últimas noticias de actualidade.