A base de esforzo e sacrificio a parella pontevedresa de baile deportivo composta por Adrián Esperón e Patricia Martínez seguen logrando notables resultados a nivel internacional.
O último, un oitavo posto na Copa de Europa celebrada na localidade ucraína de Dnipro.
Alí Patricia e Adrián tomaron parte na competición de 10 bailes, modalidade que se lles dá especialmente ben e na que este ano se chegaron a situar no Top-10 mundial.
Nesta modalidade as parellas presentan os 10 bailes ata en catro ocasións, con actuacións de 90 a 120 segundos de media a medida que progresan de rolda.
Adrián Esperón e Patricia Martínez acudiron á Copa de Europa en representación da Federación Española polos bos resultados conseguidos ao longo da tempada.