A cidade valenciana de Xàtiva acolleu esta fin de semana as dúas últimas probas da Copa de España de Ciclocrós 2022, onde o Grupo Deportivo Supermercados Froiz e o XSM de Marín realizaron unha moi boa actuación da man de Uxía Soto, Gonzalo Inguanzo, Lorena Patiño e María Filgueiras.
En categoría elite/sub 23 masculina, o ciclista do Froiz Inguanzo foi cuarto na proba disputada o sábado, por detrás de Felipe Orts, primeiro e gran favorito para facerse coa vitoria na súa terra, Venturini foi segundo e Doubey chegou terceiro.
Na carreira do domingo, Inguanzo impúxose nun rápido circuíto realizando un bo sprint nos últimos metros nos que superou a Venturini e Alain Suárez, segundo e terceiro respectivamente.
Con estes resultados, o da escuadra alimenticia proclámase mellor sub-23 da Copa de España.
En categoría mulleres, Froiz e XSM tiñan as miradas postas nas carreiras cadete e júnior.
En cadete, Lorena Patiño fixo dobrete, tanto sábado como domingo, impoñéndose con claridade contra os seus opoñentes e adxudicándose a Copa de España.
Finalmente, en categoría júnior, María Filgueiras (XSM) gañou na xornada do sábado, seguida de Uxía Soto (Froiz), que foi segunda.
O domingo, en cambio, Filgueiras tivo que cambiar dúas ocasións de bicicleta e Uxía Soto arrebatoulle a primeira praza. A do XSM chegou segunda tras un apertado sprint con Laia Bosch.