Fin de semana atarefado para o Club Natación Galaico. Dúas competicións de ámbito autonómico fixeron competir a 55 nadadores do equipo pontevedrés, con grandes resultados para moitos deles.
A piscina de Batallóns de Ferrol acolleu o sábado o Campionato Galego Promesas e o Galaico desprazou ata a cidade departamental a un total de 30 nadadores, que se enfrontaron aos dez clubs máis potentes de Galicia.
Os pontevedreses quedaron en segunda posición a tan só dous puntos do primeiro clasificado, o Club Natación Portamiña de Lugo. Proclamáronse, por tanto, subcampións galegos nesta categoría.
Pola súa banda, a Ponteareas viaxaron 25 nadadores, 14 homes e 11 mulleres, para competir no Campionato Galego Master de Verán.
Todos eles competiron a moi bo nivel, logrando un cuarto posto na clasificación conxunta dun campionato no que participaron 21 clubs galegos e 280 nadadores.
Entre os resultados destacan a medalla de ouro do relevo 4x50 libres, con Antonio Piñeiro, Rubén Fontenla, Pablo Piñeiro e Pablo Expósito, que lograron récord galego. O cuarteto repetiu medalla de ouro no relevo do 4x50 estilos.
O Club Natación Galaico conseguiu un total de 11 medallas de ouro, 10 de prata e 7 de bronce.