O Poio Pescamar leva semanas co seu plantel practicamente perfilado, pero faltaba a guinda ao pastel.
Ese movemento é a chegada da brasileira Rafaela Dal'Maz, coñecida como Rafa Pato, e que se converteu na sétima fichaxe estival no conxunto conserveiro.
A pivote brasileira, de 34 anos de idade, aterra na Seca procedente do Pescara italiano e tras unha importante traxectoria tanto no seu país como a nivel internacional.
Formada no equipo da súa cidade, o Guarapuava, gozou da súa primeira experiencia europea no Tyumen ruso, onde gañou a liga. Tamén levantou o Campionato de Brasil co São José Futsal antes de regresar a Europa co Benfica. Foi o paso previo a trasladarse a Italia, defendo ao Salinis, Città di Falconara, Montesilvano e Pescara, ademais de ser citada pola Selección Italiana ao contar con dobre nacionalidade.
Tamén xogou ao fútbol 11 no seu país e mesmo en Europa no Zuchwill suízo.
"O meu obxectivo é integrarme canto antes co meu novo grupo, entender o que quere de min o técnico e adaptarme a esta nova realidade", afirma a nova futbolista do Poio Pescamar.
Rafa Pato únese desta forma a unha lista de fichaxes na que xa figuraban Zaide Pérez, Carolina Pedreira, Débora Lavrador, Noelia Montoro, Carolina Bravo e Yanira.
O persoal vermella conta desta forma con 14 futbolistas confirmadas xunto ás renovadas Miri, Candela, Elena González, Ale de Paz, Martita, Èlia e Chuli.