O Poio Pescamar FS xa coñece a súa folla de ruta para a tempada 2025-26 na Primeira División de fútbol sala feminino.
O conxunto que dirixe Luís López-Tulla comezará a súa andaina o próximo 6 de setembro como local, enfrontándose ao PH-Quirogel AE Penya Esplugues no pavillón da Seca.
Segundo o calendario presentado pola Real Federación Española de Fútbol en San Juan de la Nava (Ávila), as conserveiras afrontarán o seu segundo compromiso ligueiro o 13 de setembro, cando visitarán o CD Guadalcacín FS en terras andaluzas.
A fase regular da competición estenderase ata o 30 de maio de 2026, data na que o Poio Pescamar pechará a competición regular cun desprazamento para medirse ao FSF Castro Bloques Cando.
Unha vez finalizada a liga regular, os mellores clasificados disputarán as eliminatorias polo título, con semifinais que comezarán a fin de semana do 6-7 de xuño.
En canto á Copa da Raíña, a competición vai comezar o 13-14 de setembro coa primeira eliminatoria, na que participarán equipos de Segunda División. A segunda rolda disputarase o 23-24 de setembro e a terceira o 16-17 de decembro, mentres que a fase final está programada para os días 1, 2 e 3 de maio.
A tempada 2025-26 estará marcada pola participación da Selección española na primeira edición do Mundial feminino de fútbol sala, que se celebrará en Filipinas do 21 de novembro ao 7 de decembro. As xogadoras dirixidas por Clàudia Pons obtiveron a súa praza mundialista o pasado mes de marzo en Francia.
O Poio Pescamar afronta a súa décimo terceira tempada consecutiva na máxima categoría, onde sempre logrou clasificarse entre o oito mellores equipos. Nas campañas 2022-23 e 2023-24, o club disputou por primeira vez na súa historia os playoffs polo título.
O palmarés das conserveiras inclúe 4 Copas Galicia, un subcampeonato de Copa da Raíña e dous subcampeonatos da Supercopa de España.