Grande carreira a protagonizada por Pablo Dapena na Copa de Europa ETU Premium de Constanta-Mamaia (Romanía).
O triatleta pontevedrés foi un dos protagonistas da proba recuperando as sensacións perdidas tras unha tempada lastrado polas lesións.
Dapena foi segundo en liña de meta só superado polo tamén galego e compañeiro de equipo Uxío Abuín. Ambos os dous mantivéronse sempre no grupo de cabeza dunha carreira disputada en distancia olímpica (1.500 metros de natación, 40 quilómetros de ciclismo e 10 quilómetros de carreira a pé).
A competición decidiuse no tramo a pé, con Abuín marcando os mellores parciais para rematar cun tempo de 1:54:58, 26 segundos mellor que Pablo Dapena (1:55:24). Terceiro foi o ruso Andrey Bryukhankov (1:55:36).
Un resultado en Romanía que supón un golpe de moral para o pontevedrés no tramo final da tempada e que el mesmo celebraba co seu compañeiro de equipo ao termo da carreira, compartindo esta imaxe a través de Twitter.
Doblete en la Copa de Europa de Constanta-Mamaia, estamos vivos!! @Viator_Es pic.twitter.com/k7UBN0mPLF
— Pablo Dapena Gonzale (@pablitopiny) September 6, 2015