O Marín Futsal pon o turbo na confección do plantel co que debutará a próxima campaña na máxima categoría nacional, a Primeira División.
O conxunto da Raña confirmou unha dobre renovación que eleva a sete a nómina de futbolistas ás ordes do técnico Raúl Jiménez.
Trátase de dúas xogadoras de peso no equipo que logrou o ascenso, como son Jessica Jineth 'Café' e María León, dous movementos que reforzan "este proxecto ilusionante", sinalan desde a entidade marinense.
Con estas dúas renovacións o Marín Futsal asegúrase gol para o seu novo proxecto deportivo, no que xa figuraban como confirmadas as renovadas Pau, Antía e Ceci e tamén dúas incorporacións, a da internacional brasileira Gaby e da gardameta pontevedresa Silvia Aguete.