Segundo posto para Carmen Gómez Cortés no Campionato de España de Dúatlon celebrado a pasada fin de semana en Soria.
A deportista pontevedresa logrou a medalla de prata na proba júnior, disputada na modalidade de sprint (5 quilómetros de carreira, 20 en bicicleta e 2,5 de novo a pé).
Gómez Cortés protagonizou unha dura loita con Cecilia Santamaría nos dous primeiros sectores, pero rematou cedendo con claridade no último tramo chegando, cun tempo de 1:10:28, a pouco máis dun minuto da vencedora.
Terceira, un minuto por detrás da pontevedresa chegou Inés Santiago, compañeira no Tríatlon Ferrol que se levou tamén a prata por equipos.
MARGA VILLAVERDE, OURO NOS GRUPOS DE IDADE
Pola súa banda Marga Villaverde, deportista do GV Sport, impúxose no seu grupo de idade en distancia curta (10, 40 e 5 quilómetros).
Este gran resultado clasifica a pontevedresa para o Campionato de Europa da especialidade que se disputará en Alcobendas o 25 de abril, cita á que tamén se clasificaron os seus compañeiros de club Lalo Ramos e Javier Vidal.