Efectivos de Medio Rural extinguiron na tarde deste mércores un incendio forestal rexistrado nun dos dous illotes que conforman as Illas Alvedosas, situadas no fondo da ría de Vigo, entre os municipios de Soutomaior e Vilaboa.
Segundo a Consellería do Medio Rural, o lume iniciouse minutos antes das 14:00 horas e quedou sufocado arredor das 15:45 horas.
As tarefas de extinción desenvolvéronse nunha xornada climatolóxica caracterizada polas altas temperaturas e por fortes ventos de compoñente nordés.
As características xeográficas do illote e o estado da marea condicionaron o operativo de emerxencia.
O responsable de Emerxencias en Vilaboa, Carlos Bas, explicou a PontevedraViva que a intervención por medios marítimos ou dende terra resultou inviable ao non dispoñer de capacidade para achegar auga directamente á zona e por estar a marea baixa no momento do suceso.
Esta circunstancia provocaba que calquera embarcación tivese que quedar a varios metros de distancia do illote.
Por este motivo, os traballos físicos na zona foron asumidos de forma exclusiva pola brigada helitransportada, que se desprazou xunto cun axente forestal e dous avións.
O balance oficial sinala que a superficie danada pola acción do lume ascende a 3.000 metros cadrados.
A vexetación afectada era principalmente matogueira, principalmente toxos, e algúns exemplares de piñeiros e mimosas.
O vento do norte que sopraba na zona facilitou que o lume avanzase dende un extremo ao outro do illote nun período aproximado dunha hora.
Cada un destes espazos rochosos, situados na desembocadura do río Verdugo, conta cunha extensión total de arredor de 5.000 metros cadrados.
Respecto ás causas do incendio, o responsable de Emerxencias en Vilaboa sinalou que a hipótese principal é a dunha orixe fortuíta, como o efecto lupa provocado por algún cristal ou material abandonado.
Bas sinala que se descarta inicialmente a intencionalidade ao tratarse dun espazo deshabitado, sen estruturas, de valor unicamente ecolóxico e sen atractivo de explotación. Ademais, constatouse que non se rexistraron embarcacións próximas no momento do inicio do lume.
Pola súa banda, o colectivo Savia Nova, integrado por bombeiros forestais, difundiu a través das redes sociais imaxes da intervención.
O arquipélago das Alvedosas atópase incluído na Rede Natura 2000 debido ao seu valor pola presenza de aves mariñas e de hábitats costeiros protexidos.