O Club Cisne Balonmano despediu o ano como local pola porta grande.
O conxunto pontevedrés derrotou o Amenabar Zarautz no Pavillón da Cidade Infantil Príncipe para facerse cun importante triunfo no penúltimo encontro do 2024.
Pero aos xogadores adestrados por Quiños custoulles atravesar a defensa do conxunto vasco, que arrincou o encontro cun parcial de 0-2.
Non tardou o Cisne en meterse no partido grazas a un Franzini inmenso en portaría e a uns xogadores que, esta vez, conseguían atinar de cara a gol para dar a volta ao resultado aos 8 minutos de xogo (5-4).
A igualdade mantívose durante os seguintes instantes ata que os brancos, por fin, tomaron a dianteira de forma clara cun parcial de 4-0 que puña o 13-9 no luminoso.
O dominio do Cisne continuou e estableceu o 19-13 cando restaban menos de tres minutos para o descanso, pero o Zarautz espertou nos instantes finais para meterse no encontro e subiu o 20-16 ao termo do primeiro tempo.
Tras o intermedio, o conxunto pontevedrés seguiu facendo das súas e despregou todo o seu potencial ofensivo, sometendo a un rival que tentaba resistir, pero non o conseguía.
Os pupilos de Quiños non tiveron problemas para facerse co triunfo xa que ao tres minutos do segundo tempo xa se colocaron con seis goles de diferenza.
O cadro vasco logrou reducir distancias en catro tantos, pero foi un espellismo.
O Cisne pisou o acelerador e nun visto e non visto pasou como unha apisoadora sobre o seu rival, que vía como practicamente cada lanzamento dos locais transformábase en gol, que levaban o triunfo finalmente por un contundente 43-32.
Consulta as estatísticas neste enlace