O Concello de Pontevedra pechou o prazo de comunicacións para a realización de fogueiras de San Xoán cun total de 182 solicitudes rexistradas, unha cifra que confirma a forte implantación desta tradición tanto no ámbito familiar como no comunitario.
A maior parte das comunicacións, concretamente 173, corresponden a fogueiras promovidas por particulares en propiedades privadas. As nove restantes están impulsadas por asociacións veciñais, culturais e outros colectivos do municipio, que volverán converter distintos puntos da cidade e das parroquias en lugares de encontro para compartir a noite máis curta do ano.
Entre as celebracións de carácter colectivo destacan as organizadas pola Asociación Cultural da Piolla en Lérez, a Asociación Fogueira San Xoán A Armada en Salcedo ou a Asociación Veciñal e Cultural Salcedo-Norte, que celebrará a súa fogueira na contorna da rotonda de San Brais.
Tamén haberá actividades promovidas pola Asociación de Veciños Ponte Muiños, o centro social A Pedreira, a Comunidade de Montes de Verducido, a Asociación de Veciños Eduardo Pondal, o Casino Mercantil e Industrial e a Asociación de Profesionais e Pequenos Empresarios da Parda.
Coincidindo coa celebración, o Concello lembrou a necesidade de cumprir as medidas de seguridade establecidas para evitar incidentes.
As fogueiras non poderán superar os catro metros de diámetro nin os dous metros de altura e deberán situarse a máis de quince metros de calquera edificio ou masa arbórea. Ademais, as persoas asistentes deberán manter unha distancia prudencial respecto do lume.
A normativa municipal tamén prohibe expresamente acender fogueiras en vías pavimentadas, parques, xardíns ou debaixo de árbores, tendidos eléctricos, balcóns e outras estruturas que poidan supoñer un risco.
En canto aos materiais autorizados, só se permite a queima de madeira e restos vexetais leñosos, mentres que queda vetado o uso de pneumáticos, plásticos, envases, produtos inflamables, aerosois ou calquera outro elemento susceptible de provocar explosións ou emisións contaminantes.
Desde o Concello insístese tamén na responsabilidade das persoas organizadoras, que deberán contar cun teléfono operativo durante toda a celebración para facilitar a actuación dos servizos de emerxencia en caso necesario.
Así mesmo, recórdase que tanto a Policía Local como os Bombeiros poderán dar instrucións específicas durante a noite e que estas deberán ser atendidas en todo momento.