Continúan os problemas no Club Cisne Balonmano tras caer no seu enfrontamento co Barça Atlètic por 33-28.
O encontro, clave entre dous equipos igualados na clasificación, puido marcar un punto de inflexión para os pontevedreses, que rozaron a remonta tras un mal inicio, pero acabaron cedendo ante o pegada do filial blaugrana no tramo final.
O choque comezou costa arriba para o conxunto dirixido por Quiños. En apenas oito minutos, o marcador reflectía un preocupante 7-3 que puido ser peor se Mikael Lopes non fallase o seu lanzamento desde os sete metros.
O técnico branco detivo o encontro para reordenar os seus, e conseguiu o efecto inmediato da man de Xoán Fernández e Diego López, que reduciron a diferenza. O Barça, lonxe de relaxarse, respondeu cos tantos de Jan Rof e Anselmo Collado (9-5).
A posterior exclusión de Rof deu aire ao Cisne, que aproveitou a súa superioridade numérica para achegarse no marcador ata o 9-8, pero cando o filial culé volveu verse en problemas, pisou o acelerador e volveu abrir unha nova fenda (14-10). Os últimos minutos do primeiro acto mantiveron esa tónica, con dominio local e un 19-14 ao descanso.
Tras o paso por vestiarios, chegou a mellor versión do conxunto lerezano. En apenas seis minutos, asinou un parcial demoledor que lle permitiu igualar o resultado (20-20) e sementar dúbidas no equipo barcelonés.
O intercambio de golpes foi constante e os de Pontevedra mesmo se puxeron por diante por primeira vez no encontro (22-23), pero o acerto de Adrián Solá e Jan Blas devolveu a iniciativa ao Barça Atlètic (24-23).
A doce minutos do final, Manu Lorenzo volveu empatar, pero dous erros consecutivos por parte do Cisne no momento máis crítico castigounos o cadro catalán colocando o 26-24. Quiños pediu un novo tempo morto, pero o seu equipo xa non logrou atopar solucións ofensivas. O Barça Atlètic soubo aproveitar as perdas dos brancos e sentenciou ao contragolpe, ampliando a distancia ata o 33-28 final.
Consulta as estatísticas neste enlace