Dous meses acumula xa sen gañar o Club Cisne Balonmán na División de Honra Prata, pero o equipo pontevedrés deixou 'brotes verdes' e motivos para o optimismo este sábado plantando cara no Pavillón Municipal dos Deportes o BM Proin Sevilla, líder da categoría.
O resultado final foi de derrota (25-26), pero os pontevedreses venderon cara a súa pel e chegaron a soñar con puntuar para romper a súa mala serie e escapar dos postos perigosos da táboa.
Tiveron de feito a posesión para empatar a 30 segundos da conclusión, pero a defensa andaluza provocou a perda de Xoán Fernández nesa última acción para asegurar os puntos en xogo para o seu equipo.
Os de Quiños saltaron concentrados á pista do Municipal, cun parcial de 3-0 de saída que obrigou a reaccionar ao Proin Sevilla. Custoulle de feito ao líder 15 minutos igualar o marcador (4-4).
O cadro sevillano completaba a remontada e empezaba a dominar con rendas que chegaron ao tres tantos (6-9), minimizando danos o Cisne cun tanto final de Xoán Fernández antes do descanso (8-10).
Os pontevedreses, intensos en defensa aínda que con problemas por momentos nos seus ataques, non se renderon e atoparon a súa recompensa nun parcial de 3-0 con dous tantos de Joao Ferreira (acabou o choque con 11) que devolvían as táboas ao electrónico a 18 minutos da conclusión (16-16).
Non chegou a poñerse por diante o Cisne, cun líder que levaba a iniciativa con rendas que volveron dispararse até o tres tantos (20-23), pero seguiu pelexando o conxunto local para manterse con opcións.
Unha demostración de empuxe que non atopou recompensa nun apertado final, pero que demostra que os pontevedreses non se van a dar por vencidos na loita pola permanencia na División de Honra Prata.
O duelo serviu de debut da recente fichaxe cisneísta, Santiago Bedoya.
Coa derrota o Club Cisne queda estancado con 13 puntos na undécima posición, cunha estreita marxe sobre a zona de descenso.